Trump-an Taliban nena inbiak tur a ṭhulh

US president Donald Trump chuan Afghanistan-a remna leh muanna a awm theihna atan Taliban nena inbiakna neih tur chu a ṭhulh tih a sawi.

Donald Trump chuan kum 18 chhung Afghanistan-a firfiak nena indona tihtawp a nih theihna atana remna kawng zawnga inbiakna neih tur chu a ṭhulh thut tih a twitter-ah a tarlang. Nimin khan Afghanistan president Ashraf Ghani leh Taliban hruaitute nen inhmu tur an ni tih sawiin, Trump chuan tunhnaia US sipai pakhat thahnaa Taliban-ten an inhnamhnawih ngei tih an sawi leh tak avangin inbiakna neih tur hi a ṭhulh a ni.

Camp David-ah Taliban aiawhte nena inbiakna hi neih tum a ni. Mahse kum khat dawn inremna siam tuma hma an lak hnuah, president Trump chuan meeting neih tur hi a ṭhulh thu leh, remna leh muanna zawnga inbiakna kalpui mek chu tihtawp a nih thu a sawi. 

US leh Taliban-ten inremna siam tuma rawtna an siamah, kar 20 chhungin Afghanistan-a US sipai 5,400 lakchhuah rawt a ni. Hemi chhan let nan hian Taliban-te chuan Afghanistan-a firfiak zawnga chetna thlen tihtawp an tiam bawk. Afghanistan-ah hian US sipai 14,000 vel an la awm mek a ni.