Nepal-ah Industrial park din belh

Nepal khawthlang lama Chitwan district-ah Nepal leh China chuan Nepal industrial park pahnihna tur an din dawn.

Embassy of Nepal to China leh Economic Joint Committee of China Commercial Stock Enterprise-te chuan Nepal-China Economic and Trade Cooperation Forum chu kar kal ta Inrinni khan an buatsaih a, he hun hi Nepal Vice President Nanda Bahadur Pun chuan a hawng.

Chitwan district-a industrial park hian nakinah chuan sum­dawng tam takte a la hipkhawm tura ngaih a ni a, chutih rualin industrial park hian a hrin chhuah tur pakhat chu industry lama thilsiam chhuahna hmun lian tak leh thilsiam chhuaktu (manufacturer) a ni ang.

Nikum April khan Beijing-ah Nepal-China Economic and Trade Cooperation Forum hi buatsaih lo ni tawhin, Nepali president Bidya Devi Bhandari pawh a tel a ni. Nepal prime minister KP Sharma Oli chuan Nepal hmarchhak Jhapa district-ah, an rama industrial park hmasa ber chu China nena thawhdunna hnuai thoa din a nih thu a sawi.

Nikum khan Nepal foreign direct investment (FDI) contri­butor lian ber chu China a ni a, chinese investor-te thawh­rimna avangin kum li chhung chu China hi Nepal FDI contributor lian ber a ni. Nepal Department of Industry chuan fiscal year liam taah khan China aṭang hian FDI-ah US dollar mtd 114 an hmuh thu an tarlang.

Nepal PM hlui leh Nepal Communist Party co-Chairman nilai Pushpa Kamal Dahal chuan Chitwan district-a industrial park din belh a ni tur thu hi a thlawp a, kan rama province pasarih-ah industrial lama hmasawnna hi kan mamawh em em a ni, a ti. 

Minister for Industry, Com­merce and Supply Matrika Prasad Yadav chuan industrial park din a nih chuan investor-te a hip belh dawn thu sawiin, he hmalakna turah hian a ministry chuan a ṭul anga hmalak zel a inhuam tih a sawi. Nepal-China Economic and Trade Cooperation Forum-ah hian Nepal province hrang hrang aṭanga chief minister-te pawh an tel a ni.