Iran tanker-in Syria lam a pan!
Iran tanker Grace 1 tia hriat ṭhin, man a nih hnua Adrian Darya-1 tia a hming thlak tak chuan Syria lam a pan lai thlalak satellite-in a lo lakfuh chu tihchhuah a ni.
Adrian Darya-1 hian Syria lam hi a pan dawn lo niin sawi mah se satellite thlalak aṭang hi chuan a pan tho tih a hriat a, hei hian ngaihven a hlawh hle. Thlalak tichhuaktu hi US company Maxar Technology-te an ni a, Zirtawpni khan Syria tuipui kam Tartus hnaih takah a awm lai tlalak chu an tarlang.
US National Security Advisor John Bolton chuan a twitter-ah oil tanker-in Syria a pan lo nia ringte chuan an pha lui a ni ang, tiin a ziak hial. Tehran chuan a ram mipuite aiin tualthattu Assad regime-te a ngaipawimawh zawk a ni. Inbiakna chu kan nei thei a, mahse dawtsawi a tihtawp a, buaina thlen a tihtawp hma chuan Iran hrekna chu engmah hlih a ni lo ang, tiin a ziak.
Hetihlai hian Adrian Darya-1 hian Iranian crude oil barrel mtd 2.1 zet a phurh hi Syria-ah hian a 'unload' em tih erawh finfiahna a la awm lo thung. Hemi chungchangah hian Iran leh Syria chuan thuchhuah engmah an la siam lo.
Engatinge Syria a pan chu an helh?
Adrian Darya-1, a hmaa Grace 1 tih ni ṭhin hi Syria-a a bungraw phurh turte dah tura kal a nih rinhlelh avangin British marine-te chuan manin Gibraltar-ah hun eng emaw chen an hreng a ni. Syria hi European Union-in an hrek lai a nih avangin bungraw phurh luh hi an hrekna siam palzutna tur a nih avangin an duh lo hle a ni.
Hun eng emaw chen Gibraltar-ah hian hren a nih hnuah Syria hi a pan dawn lo tih tiamin Gibraltar pawh US-in hreng rih tura nasa taka a ngen chungin a chhuah lui. July thlaah khan manin August thla tirah khan chhuah a ni a, tunah Syria lam a pan nia a lan leh tak avang hian boruak a sosan zui leh rinna a nasa hle.