US-in UAE hnena ralthuam leitirna tur titawp rih

US President kalchhuak, Donald Trump hun laia US-in United Arab Emirates (UAE) hnenah indo thlawhtheihna, F-35 stealth fighter jet leitir a remtih tawh chu President thar, Joe Biden kaihhruai sorkar chuan a titawp rih. 

Nikuma Trump hmalaknaa UAE-in Israel nena inlaichinna siam a remtih hnuah khan, US sorkar chuan UAE hnena F-35 fighter jet leitir hi a remti a ni. 

Mahse Biden kaihhruai sorkar thar hnuaia US Secretary of State, Antony Blinken chuan press conference a neih hmasak berah, sorkar hmasa hnuaia ralthuam hralhna tura inremna lo siam tawhte chu ennawna zirchian leh phawt a ni dawn tih sawiin, heng inremna lo siamte chu tihtawp rih a nih thu a sawi. Heng zingah hian UAE hnena fighter jet hralhna  tura inremna an lo siam pawh hi a tel a ni. 

US Secretary of State atana lakluh a nih hnua press confe­rence a neihah, Blinken chuan sorkar tharin ralthuam hralhna tura inremna lo siam tawhte tihtawp lailawk hi tihdan phung pangngai niin a sawi. 

Israel prime minister Benja­min Netanyahu chuan US-in UAE hnena F-35 fighter jet leitir a tumna a tihtawp leh rih chuan Isarel leh UAE inlaichinnaah nghawng ṭha lo a neih phah dawn lo tih a sawi. "Israel nena inzawmna ṭha neih chu hlawk­puina tur tam tak a awm a ni tih mi tupawhin an hre vek a ni," tiin arms deal siam tawh hi kaltlangpui a nih tho a rin thu a sawi a ni.