Indonesia-a Rohingya raltlante chin hriat lohin awm

Indonesia hmarlam tuipui kam, Lhokseumawe-a refugee camp-a Rohingya raltlan awm zinga tam tak chu an chin hriat lohin an awm mek. 

Nikum June leh September thla inkar khan Myanmar aṭangin lut, Rohingya raltlan 400 chuang chu Lhokseumawe camp-ah hian an awm a, mahse tun kara enfiahnaah camp-ah hian raltlan hi 112 chauh an lo awm tawh a ni. 

Tualchhung thuneitute leh United Nations pawhin he camp-a awm ṭhin, raltlan dangte hi khawi hmunah nge an awm tih an hre lo a, official ṭhenkhat chuan Malaysia lamah sumdawnna atana hruai an nih an rin thu an sawi. 

Kum 2017-a Myanmnar sipaite an rama Rohingya Muslim te laka beihpui an thlak avang khan Rohingya nuai 7.5 vel chu Bangladesh ramah an tlanchhia a, Bangladesh chhimchhak lama tuipui kam, Cox's Bazar-a refugee camp-ah dahkhawm an ni. Mahse he hmun aṭang hian mi tam tak chu tlanchhuakin, Indonesia leh Malaysia ramte hi an pan a ni. 

Bangladesh sorkar chuan Cox's Bazar aṭang hian Rohingya raltlante hi nikum December thla aṭang khan Bohsan Char thliarkarah a sawnchhuak ṭan. Nikum khan mi 3,500 chu sawnchhuah ni tawhin, mi dang 2,000-3,000 chu sawnchhuah leh thuai an ni dawn tih a sawi.