WHO team-in Wuhan hospital an tlawh
Covid-19 hri chhuah dan leh a darh dan zirchiang tura Wuhan, China-a kal, World Health Organisation (WHO) expert team chuan khunghran an nih hun an hman zawh hnuah nimin aṭang khan field work an ṭan ta.
WHO team hian nimin khan Chinese scientist-te hmuin an programme duante an hrilh a, hemi hnu hian Wuhan khawpuia Covid-19 kai hmuh hmasakte enkawlna hmun, Hubei Provincial Hospital of Integrated Chinese and Western Medicine an tlawh.
He hospital-a department of respiratory and critical care-a director, Zhang Jixian chu kum 2019 kum tawp lama kum upa lam tawh nupa, an CT scan aṭanga pneumonia chi dang chi nia lang enkawltu a ni a, state media chuan Jixian hi novel coronoavirus chungchang report hmasa bertu niin an tarlang.
WHO team menber, Peter Dazak chuan an thil zirchianna atana pawimawh tak, Covid-19 kai hmasate enkawlna hospital an tlawh thu leh, he damdawi-ina thawkte pawh an hnathawh dante an sawipui thu a tarlang.
Expert team hian an hun hman dan tur chipchiar hi an puangzar lo a, mahse hri hmuhchhuah ṭanna seafood market bakah Wuhan Institute of Virology te chu an tlawh hmasak tur zingah an telh a ni.
China foreign ministry thupuangtu, Zhao Lijian chuan WHO leh Chinese expert-te chu hri chhuah dan zirchianna kawngah ṭha taka an thawhho thu a sawi a, hemi rual hian an hnathawh 'investigation ni loin research a ni', a ti.