Britain PM-in fiahna a paltlang

Britain Prime Minister Theresa May-i chuan Nilaini khan Parliament-ah fiahna a paltlang. 

PM fiahnaah hian May-i thlawp lamah vote 325 tlain, a ring tawk lo lamah vote 306 a tla a, May-i hian fiahna paltlang tura vote hmuh ngai zat chu 19 in a pel a ni. 

Thawhlehni khan Britain Parliament hian PM May-in European Union aṭanga Britain inlakhranna tura inremna an duan, Brexit deal chu a hnawlsak thung. May-i brexit deal hnawl a nih tak avangin PM rin tawk lohna motion hi Parliament-ah putluh a ni a, mahse May-i hian fiahna hi a paltlang leh tho a ni. 

Fiahna a paltlang hnua thu a sawiah, May-i chuan European Union an chhuahsanna turah mipuite duh dan anga kalpui a nih theihna turin a theihtawp a chhuah zel dawn tih a sawi. Political party hrang hrang aiawhte chu meeting neihpui turin a sawm nghal a, hemi rual hian rilru inhawng tak tura sawmin an pawm tlan theih tur inremna an zawn a ngai tih a sawi. 

EU aṭanga Britain inlakhranna kalpui dan tur PM May-i leh EU hruaituten an duan, Withdrawal Agreement chu Britain MP tam zawkin an ram tam a him tawk lo nia sawiin an duh lo a, Thawhlehni-a vote lakah pawh duh lo lamah vote 432 tlain a thlawp lamah vote 202 chauh a tla thung a ni. 

Britain hian kum 1973 khan European Union hi a zawm a, mahse kumin March 29 ah EU aṭanga inlakhran hi a tum a ni. EU aṭanga a inlakchhuah hun tur thla hnih chuang awrh chuah a ni tawh a, hetihlai hian withdrawal agreement an hnawl leh tak avangin eng angin an kalpui dawn tih a la hriat theih loh a ni.