El Chapo-an Mexico president hlui thamna dollar mtd 100 pe!

Mexico rama ruihhlo tawlhrutu pawl lian hotu, Joaquin El Chapo Guzman chuan Mexico president hlui Enrique Pena Nieto hnenah thamna dollar maktaduai 100 zet a pe niin Guzman-a thawhpui hnai tak pakhat chuan a sawi. 

Kum tam tak chhung Guzman-a thawhpui hnai tak, Alex Cifuentes chuan hemi chungchang hi kum 2016 khan thuneitute pawh a lo hrilh tawh niin New York court a hrilh. Nieto hi kum 2012-2018 chhung khan Mexico president a ni. 

Guzman hi US-a ruihhlo tawlhrutu lian ber, Sinaloa drug cartel hotu a ni. Kum 2013-a man a nih hnuin US-ah a thubuai ngaihtuah turin thawn a ni a, nikum November thla aṭang khan a thubuai hi Brooklyn-ah ngaihtuah ṭan a ni. 

Brooklyn courthouse-a reporter-ten an tarlan danin, Pena Nieto hian Guzman hnenah hian dollar maktaduai 250 a phut a, mahse dollar maktaduai 100 pe turin an inrem thei ta a ni. Cifuentes chuan heng pawisate hi Guzman-a ṭhian pakhat chuan kum 2012 October thla khan Mexico City-ah president hlui hi a pe niin a sawi. He puhna chungchang hi Nieto hian a la chhang let lo.