DR Congo tualchhung buaina thlengah mi 900 thi

United Nations chuan Democratic Republic of Congo (DR Congo) a tualchhung buaina thleng vangin nikum December thla chhung khan mi 900 zet an thi niin a tarlang.

UN Human Rights Office chuan Yumbi state-a thingtlang khaw pali-ah Banunu leh Batende hnam inkarah buaina hi a chhuak tih sawiin, tharum thawhna nasa tak thleng vang hian nikum December 30-a Yumbi-a president thlan tur pawh sawn hlat a ngaih phah niin a sawi. Buaina hi December 16-18 inkar khan a chhuak a ni. 

Buaina chhuakah hian chenna in 465 vel zet hal a ni a, primary school, health centre, health post, bazar leh electoral commission office-te pawh hal tel a ni bawk. Mi 16,000 zet chu himna zawngin an ṭhenawma Republic of Congo, Congo-Brazzaville-ah an tlanchhia a ni.

President thlan hi Yumi bakah North Kivu Province-a Beni leh Butembo-ah tikhawtlai niin, March thlahah vote an thlak ve chauh dawn a ni. Inthlanah hian eptu pawl candidate Felix Tshisekedi chu tlinga puan a ni tawh a, mahse eptu candidate dang leh pahnihna, Martin Fayuly chuan hnehna changtu zawk niin an insawi a, Tshisekedi chuan president kalchhuak tur Joseph Kabila chu inremna a siampui niin a puh. Fayulu hian kar kalta Inrinni khan vote tlate chhiar ṭhat leh phutin Constitution Court-ah a appeal a ni.