Inbiakna tihtawp hi US-in a tuar zawk dawn: Taliban
US president Donald Trump-a'n inremna kawng zawnga Taliban nena inbiakna a tihtawp thu a sawi hnuah, Taliban chuan inbiakna hi tihtawp a nih chuan US chu a tuar nasa tur zawk a ni ang, a ti.
Afghanistan-a kum 18 chhung zet indona thleng tawh tihtawp dan ngaihtuaha inbiakna neih mek, US president Trump-a'n tihtawp a nih thu a sawi chu an dem tih Taliban chuan an sawi. Hei hian midang tumah tina loin, America mite vek a tina dawn tih an sawi a ni.
Trump hian Pathiannia Taliban aiawh leh Afghanistan president Ashraf Ghani-te nena Camp Davis, Maryland-a secret meeting an neih tur chu a ṭhulh tih Inrinni khan a sawi a, Taliban nena inbiakna neih mek pawh tihtawp a nih thu a sawi.
Taliban chuan inbiakna neih mek tihtawp a ni chu US-in a tuar zawk dawn nia an sawi bakah, hei hian inremna a awm an duh tak tak lohzia a tilang a ni, an ti. Taliban chuan kum 18 chhung an lo beih tawh angin, Afghanistan-a ramdang mite umchhuak turin an bei zel dawn a, Afghan mite chu zalen takin, an duhthu ang ngeia an awm theihna turin an beih chhunzawm zel dawn tih an sawi a ni. Inbiakna an neih tawh chinah US team lam pawh an hlim hle nia an hriat thu leh, boruak ṭha tak hnuaia inbiakna an neih ṭhin thu sawiin, hetihlai kara president Trump-a'n inbiakna tihtawp a nih thu a puang chu an dem tih an sawilang bawk.
Taliban nen inremna zawnga inbiak a ni lo ang : Afghan sorkar
US president Donald Trump-a'n Taliban nena inbiakna neih an tum ṭhulh a nih thu a puan hnu lawkah Afghanistan hian thuchhuah a siam zui ve nghal.
Afghanistan president thupuangtu, Sediq Sediqqi chuan Pathianni khan an ram khawpui Kabul-a press conference-ah tharum thawhna an chhunzawm zel a nih chuan Taliban nen inremna zawnga inbiak a ni lo ang, a ti.
Taliban-te chuan Afghanistan mite an thah ṭhin chu an titawp a ni loh chuan remna tak tak a awm dawn lo tih a sawi a, Afghanistan sorkar nen direct-a inbiakna neiin inkahhai an puang a,an zawm a ngai a ni, tiin a sawi bawk.