Hong Kong-ah khualzin tlahniam nasa

Hun rei tak chhung nawrh huaihawt avanga buaina chhuah vangin Hong Kong-ah chuan August thla chhung khan khualzin nasa takin an tlahniam.

Hong Kong Financial Secretary Paul Chan chuan an khawpui tlawhtu chu nikum nena khaikhin chuan 40% vel zetin an tlem tih a sawi. Nikum khan khualzin maktaduai 30 vel zet an nei a, kumina khualzin awm zat chiah tarlang lo mah se an tlahniam nasa hle tih a sawi a ni. Nikum lam kha chuan Hong Kong hi khawvel khawpui zinga khualzinten an tlawh nasat ber zingah a tel pha a ni. 

Thla eng emaw zat chawl loa nawrh huaihawt a nih avangin Hong Kong hian buaina an tawk nasa hle a, thlawhtheihna thlawk leh rel tlan tur tibuai khawpin nawrh huaihawtte hian buaina an siam nasa a ni. Paul Chan chuan nawrh huaihawt vangin Hong Kong chu khawvela hriatah a thang mawi lo hle tih a sawi.