Premier League club lei a harsa

French Ligue 1 club Nice leitu company Ineos-a football division head Bob Ratcliffe chuan Premier League club lei tumin beng chhi hman mah se an tan a harsat thu a sawi. 

Bob-a unaupa Sir Jim Ratcliffe chu Ineos neitu hi a ni a, ani inpekna vangin Nice hi an lei thei. Bob Ratcliffe chuan, "Premier League club thli thlaiin hun chu kan hmang ngei alawm. "Mahse, tun dinhmunah chuan kan tan Premier League club lei a awlsam lo. Top six club chu pound tluklehdingawn 2 chuang man vek an ni a, a hnuai lam lah £150m an ni. 

"£50m seng ila,  'Everton Cup' bak kan khel lo ang," a ti! Bob chuan Chelsea nen pawh an indawr ngei thu sawiin, "Kan inbe ngei a, mahse inrem chu hlat tak kan ni," a ti. Ineos hian Newcastle United pawh an thlithlai a, mahse France lam an hawi ta zawk. Nice an lei khan pound maktaduai 88.77 bak an seng lo.