Russia-ah Navalny thlawptu 500 chuang an man leh

Russia eptu hruaitu leh jail-a tang mek, Alexei Navalny thlawpna lantirin Russia ram khawpui hrang hrangah rally huaihawt chhunzawm zel a ni a, Russia police-te chuan rally-a tel zinga mi 500 chuang an man leh niin nimin khan OVD-Info monitoring group chuan a sawi. 

Moscow police-te chuan eptute nawrh huaihawt vang hian metro station-te kharin, khawpui chhunga mipui punkhawm an khap a, mahse hetichung hian mi tam tak chu Navalny chhuah tura phutin an pungkhawm tho a ni. 

Novosibirsk khuaah mi 2,000 velin kawng zawhin, zalenna an duh thu an aupui a, an ram President Vladimir Putin chu rukru tiin an au el bawk. 

Yakutsk-ah pawh khaw vawt lam -40C ni chungin mi eng emaw zatin kawng an zawh bawk. Omsk leh Yekaterinburg khuaah pawh kawngzawh hi huaihawt a ni bawk a ni. Kar liam ta khan khawpui hrang hranga nawrh huaihawtnaa tel mi 4,000 vel chu hren an lo ni tawh bawk a, anni bakah Navalny thawhpui hnai tak tak mi eng emaw zat man an ni bawk.

Khawvela chawimawina sang, Nobel Peace Prize 2021 nominee zingah Russia eptu hruaitu Alexei Navalny hi a tel a, ani bakah he chawimawina dawng thei tura nominate zingah World Health Organisation (WHO) leh a Covax programme, climate campaigner Greta Thunberg-te pawh an tel bawk. 

Navalny hi an ram siamṭhat a, democracy tundinna tura a beih avangin Russian academics-ten an nominate a ni. Nominee zingah hian US president hlui Donald Trump, NATO leh UN refugee agency (UNHCR) te pawh an tel. Nomination thehluh hun hi nimin khan a tawp a ni. 

Chawimawina dawng tur hi Norway Parlia­ment-in a ruat, member panga awmna Nor­wegian Nobel Committee-in a thlang dawn a, October thlaah an puang ang.