WHO team-in Covid-19 kai hmuhchhuahna hmasa ber Wuhan khawpuia seafood market an tlawh

World Health Organization (WHO) expert team, Covid-19 darh dan zirchiang tura China-a cham mekte chuan nimin khan Covid-19 hrikai an hmuh chhuahna hmasa ber, Wuhan-a seafood centre Huanan market an tlawh. 

Venhimna khauh tak hnuaiah WHO team hian Huanan hi an tlawh a, helai hmun hi thirlena hung vek tawh niin WHO expert team-te hian hun an hman zawh hian thuthar thehdarhtute zawhna an la lo a ni. Chinese official eng emaw zatin an zui bawk. 

China an thlen hnuah WHO team hi kar hnih chhung lai quarantine phawt niin, kar liam ta Ningani khan khung hran an nihna aṭangin chhuah an ni a, hemi hnu hian damdawi-in leh bazar hmunte an tlawh a ni. Mahse China sorkarin a phalsak hmun chiah an tlawh thei a, tualchhung mite nen pawh an inbiak pawh an phalsak lo. Covid-19 hri kai hriat hmasak an enkawlna, Wuhan Jinyintan Hospital leh Hubei Integrated Chinese and Western Medicine Hospital an tlawh tawh a ni. Kar liam ta Inrinni khan Covid-19 puala museum exhibition siamna hmun an tlawh bawk. 

Huanan Seafood Wholesale Market hi hri leng vanga nikum kumtira khar a nih hnu khan vantlang kalpawh phal a ni tawh lo. Khar a nih hma chuan bazar lun tak a ni ṭhin. December 31, 2019 khan helai hmun nena inzawmna nei nia an hriat pneumonia dangdai tak case pali hmuh a ni a, January 2020 tawpah phei chuan hetiang hri hi a darh zel avangin mi nuai 11 chenna Wuhan khawpui  hi ni 76 lockdown a ngaih phah hial. Expert-te chuan Huanan market hi hrileng inṭan dan zirchianna kawngah a la pawimawh reng tih an lo sawi tawh a ni. WHO team-te hun hman dan tur kimchang hi puanzar a ni lo.