British eptu pawlten Parliament hawn leh phut
British-a eptu pawl hrang hrang Labour Party, Scottish Nationalist Party leh Liberal Democrats-te chuan Parliament suspend mek chu hawn leh an phut.
Nilaini zanah khan eptu pawlte hian Parliament hawn leh an phut thu hi an tarlang a, Scottish Court pawhin Prime Minister-in Parliament a suspend chu dan kalh a nih thu a puang bawk.
Hemi chungchang hi kar lehah hian Supreme Court-ah ngaihtuah a ni dawn. Sawiselna nasa hle mah se Downing Street chuan October 14 hma chu Boris Johnson-a'n Parliament hawn a tum loh thu a puang chiang thung. Mahse Supreme Court hian hawng leh tura a tih chuan an dang thei dawn lo thung a ni.
Members of Parliament (MP)-ten House suspend hawng leh turin vote la mah se Nilaini zan thleng kha chuan sorkar chuan hemi chungchanga an sawihona hi engmah a la sawichhuak lo. British media-te chuan MP 650 zinga 40 chu Nilaini khan hna chhunzawm turin Parliament-ah an kal lui a, hei hi Scottish Court an thlawpna lantirna atana ti an nih thu an tarlang.
House of Commons Brexit committee chairman leh Labour politician Hilary Benn, Liberal Democrat leader Jo Swinson leh Labour member Meg Hillier-te pawhin parliament suspend chhung pawh hian hna an thawh chhunzawm dawn tih an sawi. Mahse hemi chhung hi chuan debate emaw thurelna emaw an nei thei lo thung.
Political body mai ni lo, Britain trade union lian tak takte pawhin Johnson hi parliament hawng leh turin an nawr a, nawrh huaihawtah te pawh an vau ve bawk a ni.