Al Qaida hotuin muslim-te fuih

Al Qaida firfiak pawl hotu, Ayman al-Zawahiri chuan Nilaini-a 9/11-a US beihna champha vawi 18-na puala thu a sawiah, Muslim-te chu US, Europe, Israel leh Russian sipaite bei turin a fuih. 

Kum 2011-a US commando-te'n Pakistan khua Abbottabad-a Al-Qaida hruaitu hlui, Osama bin Laden an thah hnu khan, Al-Zawahiri hi Al-Qaeda chief atan ruat zui nghal a ni.Al-Zawahiri chuan Islam sakhaw zuitute'n an hmelmate beih an duh a nih chuan, an sipaite chu bei turin a hriattir a, a bikin America sipaite chu khawthlang, khawchhak leh hmuntinah an awm thu a sawi bawk.

Muslim ho a fuihnaah, "In ramah America hote awmin, in sakhua zawm lo tura inzirtirna pein, eiruk hlemhletna hmangin an run mek che u a ni," tiin a sawi. 9/11puala a thuchah tihchhuah hi minute 33 leh second 28-a rei a ni a, he video hi Sahab Media Foundation chuan a tichhuak.

Kum 2001 khan Al-Qaida helhote chuan US-a World Trade Center tower pahnih leh Pentagon beiin, mihring 3,000 bawrvelin nunna an chan a ni.