Asia chhim lama solar power farm lian ber Vietnam-ah

Vietnam chuan kum khata kilowatt hour (kWh) maktaduai 688 pe chhuak thei, Asia chhim lam rama solar power farm lian ber 'Dau Tieng Solar Power Complex' chu a hawng.

Solar power farm hawn thar hi Vietnam rama artificial lake lian ber awmna Dau Tieng Reservoir-ah a ni a, Vietnam ramin solar power a siamchhuah 10% phuhruk thei tur leh chenna in 3,20,000 chawm thei tura duan a ni.

'Dau Tieng Solar Power Complex' hi Viet­nam leh Thai industrial group B.Grimm Power Public Company nen ṭangkawpa din a ni. He project hian Vietnam-a Tay Ninh province hectare 540 a zau chin leh Ho Chi Minh City-a kilometre 100 chin chu a huam dawn. Hemi atan hian USD mtd 391 invest a nih thu, developer Xuan Cau chuan a sawi.

Company lam chuan he hmalakna thar an neih hian, kumtinin carbon dioxide emission ton 595,000 bawrvel van boruaka awm tur chu an ven theih dawn thu an tarlang. Vietnam hian re­newable energy lamah ramdangte hip thei turin hma a la fo tawh ṭhin a, hydropower plant leh thermal power station-te chu an rama power pechhuak theitu tam ber a ni.