Trump-an Pelosi zin tur a ṭhulh tir

US President Donald Trump chuan House Speaker Nancy Pelosi-in Brussels leh Afghanistan-a zin a tum chu an ram sorkar shutdown mek a nih avangin a ṭhulh tir a, sorkar shutdown tihtawp dan sawiho a ngai zawk niin a sawi. 

President hian Pelosi leh a ṭhui-hruaite zin tur hi sipai thlawhtheihna an hman phalloin a lo dansak thei a ni. Pelosi hian sipai thlawhtheihna hmang hian North Atlantic Treaty Organisation (NATO) hmunpui, Belgium khawpui Brussels tlawha tum a,  Afghanistan-a US sipaite tlawh nghal a tum bawk. 

Democrats Pelosi hian Nilaini khan President Trump-an State of the Speech a neih tur chu an ram sorkar shutdown a nih mek avangin sawn hla turin a lo ngen tawh a, sorkar department eng emaw zat hna thawk mumal thei loa an awm avangin President security lam thlengin a nghawng thei dawn niin a sawi. Mahse hemi hnu, Ningani tlaia Pelosi leh Democrats hruaitu ṭhenkhatten ram dang tlawha zinchhuah an tum chu President Trump hian a lo dansak ve leh a ni.

Donald Trump chuan an ramin harsatna a tawh lai a nih avangin Pelosi chuan an ram a chhuahsan loh chu a ṭha nia ngaih thu sawiin, shutdown tihtawp dan ngaihtuaha inbiakna neihpui tur leh, Strong Border Security movember hmalaknate pawh zawm tura a duh thu a sawi. Hemi rual hian Pelosi chuan zinchhuah a duh lui ṭalh a nih chuan military aircraft hmang loin commercial airline hmang turin a ti bawk. 

Ningani vek khan White House chuan tun thla tawp lama Davos, Switzerland-a World Economic Forum neih tura sorkar shutdown a nih vang hian palai tirh an tum lo tih a sawi bawk. White House Press Secretary Sarah Sanders-i chuan ni rei tak chhung sorkar shutdown a nih avangin American hnathawktu 800,000 zet chuan hlawh pawh an la thei lo a, heng mite harsatna tawh mek chinfel dan tur ngaihtuah a ngaih avangin President Trump pawhin Davos-a a zin tur hi a ṭhulh a ni, a ti.