Eptu hruaitute khuahkhirhna hlip turin Pakistan sorkar ngen

Pakistan Supreme Court chuan Prime Minister Imran Khan-a kaihhruai sorkarin eptu hruaitute ram pawn lama an zinchhuah a khapsak chu titawp turin a ngen. Hemi rual hian anti-corruption body chu fake account case-ah an inhnamhnawiha puhna chungchang chhui chiang turin a ti nghal bawk. 

Supreme Court-in a din, Joint Investigation Team (JIT) rawtna angin Pakistan sorkar hian ramdanga zinchhuah khap, Exit Control List (ECL)-ah mi 172 zet a dah a, an zingah hian Pakistan Peoples Party (PPP) hruaitu Bilawal Bhutto Zardari leh Sindh Chief Minister Murad Ali Shah-te pawh an tel a ni. 

JIT hian president hlui Asif Ali Zardari, a farnu Faryal Talpur leh midangte hnena sum tam tham tak pekna atana account lem 32 siam nia sawi chungchang pawh a chhui bawk. Heng account lem aṭanga sum pekchhuah hi cheng tluklehdingawn 35 zet a tling nia sawi a ni. Court chuan he thubuai hi National Accountability Bureau (NAB) ngaihtuah chhunzawm turin a ti a ni.