AU-in inthlan result puan hun titlai turin DR Congo a ngen

African Union chuan Democratic Republic of Congo (DR Congo) chu president thlan result puan hun titlai turin a ngen. 

AU chuan kar hmasa inthlan result ṭhenkhat tihchhuahah rinhlelhawm thil a awm nia sawiin, result kimchang tihchhuah hun hi sawn hla turin a ngen.  Inthlan result hi nimin khan official-a tihchhuah tum a ni. 

Nikum December 30-a DR Congo president thlanna neihah hian eptu candidate Felix Tshisekedi chu chakah puan a ni a, mahse eptu candidate dang Martin Fayulu chuan result hi a pawm loh thu sawiin, hnehna changtu zawk a nih thu a sawi thung. Fayulu lamte chuan Tshisekedi hian hnehna a chan theih nan president kalchhuak tur Joseph Kabila chu inremna a siampui a, Kabila nena thuneihna insema sorkar siam zui an tum niin an puh. 

Inthlan result hian sawisel a hlawh avangin Ningani khan Ethiopia khawpui, Addis Ababa-ah AU hotute an inhmukhawm a, National Indepedent Electoral Commission in inthlan result a tarlan chu thil rinhlelhawm tak a awm avangin result kimchang puan hun sawn tura an ngen thu an tarlang a ni. '

Electoral commission in inthlan result a tarlanah, Tshisekedi hian vote tla aṭangin 38.5% a hmu a, Fayulu hian 34.7% hmuin, rorellai party candidate Emmanual Shadary chaun 23.8% a hmu niin a sawi.  

Fayulu chuan inthlan result hi a pawm loh thu sawiin, kar kalta Inrinni khan Constitutional Court-ah appeal a thehluh a, vote tlate chu chhiar ṭhat leh vek a phut a ni.