Somalia mipui mtd hnih dawn ṭam hmabakin awm: UN

United Nations chuan Somalia ram mipui maktaduai hnih vel chu eitur khamkhawp nei loin, ṭam mai hmabakin an awm tih a sawi. Ram dangte chu Somalia mite ṭanpui turin a ngen nghal bawk. 

Ni hnih chama Somalia ram tlawhtu, UN Under-Secretary-General Mark Lowcock chuan kum eng emaw zat Somalia ram hian tualchhung buaina a hmachhawn vang leh investment a hmuh ṭhat loh bakah, kum 2011 hnu lamah khawkheng nasa tak an tuar mek a ni, a ti. 

Lowcock chuan thla tam vak loah mi maktaduai ruk vel chu ei leh in khamkhawp nei loin an awm mai dawn a, an zinga hmun thuma ṭhena hmun khat phei chu chhawmdawlna tel lo chuan harsatna nasa tak an tawk dawn a ni, a ti. Tualchhung buaina thleng reng leh leilung chhiatna thleng vangin Somalia mi maktaduai 2.6 vel chuan an in an chhuahsan tawh tih a sawi. 

Lowcock leh World Bank senior official-te chuan Somalia chhimthlang lam, Baidoa-a refugee camp an tlawh nghal bawk. He hmunah hian refugee camp 435 awmin, mi 3,60,000 vel an khawsa mek a ni. Chhawmdawl hna thawktute chuan ṭanpuina tam zawk an mamawh thu an sawi a, camp-a awm hi nitin an pun belh zel tih a sawi bawk.