Twitter-in Cuba sorkar account a suspend

Social media giant Twitter chuan Cuba rama Twitter account tam tak a titawp lailawk a, heng zingah hian state-run media a tel bakah Communist party leader Raul Castro fanu account pawh a tel. Twitter chuan an policy palzutah puhin heng account-te hi a titawp lailawk a ni.

Cuba president Miguel Díaz-Canel-a'n TV-a thu­chhuah a siam, fuel an tlachham thut thei tih a sawi hnu lawkah Twitter hian account tam tak hi a titawp. Cuba sorkar thlawpu journalist pawlte chuan Twitter chet dan chu demin, thup lian tak an nei niin an sawi.

Cuban institution leh mipuite freedom of expression hrekna leh revolution leader-te ka hupbeh tumna a nih thu a sawi bawk. Account an suspend zing­ah hian Miguel Díaz-Canel thusawina TV programme, Mesa Redonda pawh a tel a, state-run newspaper Granma Digital, state radio station Radio Rebelde leh Cuban gay rights commission head, Mariela Castro-te account pawh a tel.

Díaz-Canel account erawh tihtawp lailawk a ni ve lo a, hemi hmang hian journalist-te thuchhuah pawh hi a tarlang. Twitter thupuangtu chuan a thuchhuah siamah khawi laiah tak nge dah bawhchhiat a nih a tarlang lo a,  company platform manipulation policy chuan account hrang hrang hmanga inbiakna tihbuai leh khawih danglam a khap a ni, a ti.

Account neitute chu an account suspend a nih chhan hrilh a ni tih a tarlang tel bawk.

Miguel Díaz-Canel chuan kar thar lo awm turah hian fuels supply lamah harsatna an tawk thut thei tih a sawi. Fuel supply, a bik takin diesel chu US-in Venezuala a hrek avangin nasa takin a nghawng tih a sawi. Venezuala hi Cuba oil supply tu ber a ni. Kar leh lamah 'blackout' an tawh thut theih avangin mipuite chu in lam aṭanga an hna thawk mai turin a thurawn a pe bawk.