NSA atan Mike Pompeo ruat a ni dawn lo

US Secretary of State Mike Pompeo chu National Security Adviser (NSA) atan ruat a nih dawn loh thu, White House-a thuthar lakhawm tute hmaah US president Donald Trump chuan a sawi.

Trump hian an ram National Security Adviser pathumna John Bolton chu September 10 khan a ban thu a sawi a, a ban chhan hi an ram foreign policy chungchanga an ngaihdan in ang loh avang leh Afghanistan leh Iran chungchanga an thurual loh vang a ni. US national security adviser lailawk atan hian Bolton-a deputy Charles Kupperman chu ruat a ni bawk.

National Security Adviser hna chelhtur hian candidate 15 an awm thu Trump chuan a sawi. US media-te chuan Charles Kupperman, Special Representative for the Democratic People's Republic of Korea Stephen Biegun, Special Representative for Iran Brian Hook, Fox News commentator Douglas Macgregor leh US Ambassador to Germany Richard Grenell-te chu he hna chelh thei tura mi langsarte an nih thu an tarlang.