US fund hmangin helte kan pui: Imran Khan

Pakistan prime minister Imran Khan chuan nimin khan, helte chu US Central Intelligence Agency (CIA) hnen aṭanga fund an hmuh aṭanga an puih ṭhin thu Russia Today-a interview a neihnaah a sawi.

Kum 1980 chho vela Soviet ramin Afghanistan a awpbeh lai khan, Mujahideen mite chu Islam sakhua dotu Soviet bei let turin Pakistan chuan CIA (US)-te fund hmanga a train ṭhin thu sawiin, chung hunlai chuan Pakistan chuan awn lam a neih loh thu, Khan chuan a sawi bawk.

"Afghanistan rama US a lo inrawlh ve chinah hian, Islam sakhua vuan nghettute chu US hian hel angin a rawn ngai a ni. Pakistan chuan US dollar vaibelchhe 100 vel a sen tawh mai bakah, mihring 70,000 chuangin nunna an chan tawh bawk a ni. Heti chung hian US chuan helhote pui ṭhinah Pakistan chu a puh ngar ngar tho a ni." tiin Khan chuan sawi. 

Tunhnai lawka US president Donald Trump-a'n Taliban-te nena inbiakna neih leh, secret meeting neih tur chungchang a tih tawp hnuah Khan hi a ṭawng chhuak a ni. US chuan Pakistan hi an rama helhote pui rutuah a la puh reng tho a ni.