US-in Bin Laden-a fapa thah a ni tih nemnghet

US chuan Al-Qaida firfiak hotu hlui, Osama bin Laden-a fapa, Hamza bin Laden chu US in beihpuia thlaknaah thah a nih thu kar kal ta Inrinni khan a sawichiang ta. 

US State Department-in thuchhuah a siamah, operation neihna hmun hi Afghanistan leh Pakistan ramri hrul a nih thu a tarlang. US sipaiten Osama bin Laden an thah hnuah, Hamza bin Laden hian a pa phuba lak nan, an pawlin US leh ram dangte an beih tur thu hi audio leh video-in a tichhuak tih a sawi. 

Kumin July thla khan US intelligence official-te chuan Hamza bin Laden thah a nih thu hi an dawng tawh niin NBC chuan a sawi a, mahse thah a nihna hmun leh a hun erawh a sawilang lo. New York Times pawhin US-in beihpui a thlaknaah Bin-Laden-a fapa hi thah a nih tih a sawi ve bawk.  Hetih lai hian hemi chungchang hi White House chuan engmah a sawichiang duh lo a, kar kalta Inrinni khan a sawichiang ta chauh a ni. 

Kum 2017 khan US chuan Hamza hi terrorist blacklist-ah a telh a, kum 2018 khan Saudia Arabia pawhin an ram lal thupek angin Hamza chu khua leh tui nihna a hlihsak bawk. US State Department chuan kumin February khan Hamza bin Laden lu manah hian US dollar mtd khat a lo tiam tawh a ni. 

Hamza bin Laden hi al-Qaeda dintu Osama bin Laden-a fa 20-te zinga 15-na a ni a, kum 30 mi vel nia sawi a ni. Kum 2011-a US sipaiten Pakistan-a Osama bin Laden an thah hnua a ina document pawimawh an hmuh aṭangin Hamza hi al-Qaida hotu atana rawtnate hmuh a ni. US sipaiten a pa an thah lai hian Hamza hi Iran-ah house arrest-a hren nia sawi a ni.