Ebola fund vangin Congo health minister hlui man

Democratic Republic of the Congo's (DRC) health minister hlui Oly Ilunga chu Ebola natna tuarte ṭanpuina pawisa "Ebola fund" tichingpena puh niin, an man thu Police chuan kar liamta Inrinni khan an sawi.

Oly Ilunga hi Ebola natna tuarte ṭanpuina pawisa eiru a puh a ni a, dik lo taka sum lo hmang­ah puh a ni. "Ebola response team" aṭanga ban a nih hnuah health minister a nihna aṭang a bang zui ve nghal bawk. 

Police custody a kawl mek a nih thu leh vawiin lamah dan lama thuneitute hnenah a inlan dawn thu, police thupuangtu Colonel Pierrot-Rombaut Mwa­namputu chuan a sawi. August thla aṭang khan "Ebola fund" chungchang a tihching­pen hi chhui a lo ni tawh a, kum 59 a upa Oly Ilunga hi an ram chhuahsan thei loha hren zu nghal a ni.

World Health Orga­nisation (WHO) chuan Ebola natna invenna vaccine license mumal neilo hmangah Oly Ilunga hi a lo puh tawh bawk. He mi hnu hian health minister a nihna aṭang a bang zui nghal. Congo-ah hian mihring 200,000 chuang chu Ebola natna lak ata invenna vaccine a chiu an ni. 

Kum 2014-16 inkara Guinea, Sierra Leone leh Liberia rama Ebola natna avanga mi 11,000 chuangin nunna an chan hnua, rapthlak ber Congo-ah hian nikum July thla aṭang khan a thleng a, kum 1976 hnua Congo rama Ebola hri a len ṭum 10-na a ni.