Taliban aiawhten Russia an tlawh
United States president Donald Trump-an Taliban nena inremna kawng zawnga inbiakna an neih tihtawp a nih thu a sawi hnuah, Taliban aiawhte chu Russia-ah kalin, Inrinni khan Russian official-te an hmu nia sawi a ni.
Taliban thupuangtu Suhail Shaheen chuan Taliban palaite hian Russia special envoy to Afghanistan, Zamir Kabulov an hmu tih sawiin, Kabulov hian US leh Taliban-te inbiakna chu chhunzawm leh tura a duh thu a lo sawi tih a tarlang. Taliban aiawhte pawhin US nena inbiakna chu kalpui leh an duh tih pawh an sawi ve bawk.
US leh Taliban hian nikum October thla aṭang khan Qatar-ah inbiakna hi an ṭan a, kum 18 chhung Afghanistan-a tualchhung indona chu tihtawp a, inremna siam dan kawng an zawng a ni. Ṭum kua zet inbiakna hi an neih hnu leh, a thuphunga inremna an siam hnuah President Trump chuan meeting neih tur chu ṭhulhin, inbiakna hi tihtawp a nih thu a sawi thut a ni.
Taliban thupuangtu chuan inbiakna hlawhtling taka kalpui mek a nih lai leh, inremna pawh puang thei mai tawh tura an awm hnua President Trump-an inbiakna tihtawp a nih thu a puang thu chuan a ṭhawng ve hle tih a sawi.