US-in Saudi oil facility beih vangin Iran dem
US Secretary of State Mike Pompeo chuan Inrinni-a Saudi Arabia oil facility drone hmanga beihnaah Iran chu mawhphurtuah puhin a dem thu a sawi.
Iran thlawp Yemen-a Houthi helte chuan Inrinni khan Saudi Arabia-a sorkar company Aramco oil facility pahnih drone hmangin an bei a ni. Saudi Arabia energy minister chuan Inrinni-a beih an tawh avang hian crude oil an lakchhuah thei zat chu nikhatah barrel maktaduai 5.7 zetin a tlahniam dawn tih a sawi. Mithiamte chuan hei hian khawvela oil man a nghawng dawn tih an sawi bawk a, Saudi stock exchange pui ber pawhin nimin khan 3% chiah a pechhuak thei a ni.
Houthi helten Inrinni-a drone hmanga an beih hi Aramco oil plant lian ber Abqaiq leh Khurais oilfield-te an ni. Heihi US chuan an dem hle a, Pompeo chuan a twitter-ah drone-te chu Yemen aṭanga thlawhchhuahtir an ni tih finfiahna a awm lo tih leh Tehran chu mawhphurtu an nih thu a sawi a, khawvel energy supply beihna a ni, a ti bawk.
Saudi Arabi-in beihna a tawh ṭum 100 dawnah chuan Tehran chu an inhnamhnawih tih leh khawvel ram zawng zawng chu Iran demna kawnga thurualpuiah a sawm. White House chuan Saudi Arabia chu a invenhimna kawngah president Trump chuan puih a inhuam tih an tarlang ve bawk.