Vawiinah Israel inthlang dawn

Israel ram inthlanpui chu vawiinah hian neih a ni dawn a, kumin inthlanpui an neih ṭum hnihna tur a ni. 

April 9 khan inthlan hi neih a ni tawh a, mahse party mala sorkar siam thei an awm lo. Prime minister Benjamin Netanyahu kaihhruai Likud Party chu party mala seat la hnem ber a ni a, party dangte nen ṭangrual sorkar siam tum mah se, hun tiam chhunga ṭangrual sorkar an siam hman loh avangin inthlan ṭhat a ngai ta a ni. 

Vawiina inthlan turah hian vote nei mi maktaduai 6.4 awmin, Knesset (Parliament) member 120 an thlang chhuak dawn a ni. Central elections committee-in a tarlan danin, inthlanah hian chuhtu party leh ṭangrual pawl 31 an awm. April thlaa inthlanah khan vote 67.9% a tla.

Israel Parliament inthlanah hian party mala sorkarna siam thei an la awm ngai lo. Kum 2009 inthlanah khan Kadima party chu party mala seat la hnem ber ni mah se, ṭangrual sorkar a siam thei lo. Hei vang hian seat khata la tlem zawk, Netanyahu kaihhruai Likuk Party chuan party dangte nen ṭang­rual sorkar an siam ta zawk. 

Netanyahu hi kum 1996-1999  inkar khan prime minister niin, kum 2013 leh 2015 in­thlanah a chak leh bawk. Mahse kumin April inthlan neih zawh hnua ṭangrual sorkar a siam theih tak loh avangin inthlanpui neih ṭhat leh a nih theihna turin parliament a ṭhiat a, interim prime minister erawh a la ni chhunzawm a ni.