Hong Kong-a nawrh huaihawtten UK National Anthem sa rual

Hong Kong sorkar laka lungawi lohna lantira nawrh huaihawtte chu Pathianni khan British Consulate kawtah pungkhawmin, Union Jack flag-te vaiin, UK National Anthem 'God Save the Queen' an sa rual. 

Hong Kong hi Britain awpna hnuaia awm ṭhin niin, China hnenah hlan a ni. China kuta hlan a nih hnuah pawh Hong Kong hi mahni inrelbawlna tura thuneihna pek zui niin, kum 1984 khan China leh Britain chuan Joint Declaration, 'one country, two systems' hmanna tur an ziak a ni. 

Hetih lai hian mipuite chuan Hong Kong inrelbawlnaah China chu inrawlh leh, thuneih tumah an puh a, hun eng emaw chen chu nawrh an huaihawt tawh a ni. Sino-British Joint Declaration lo siam tawh chu zawm zui a ni lo a, Hong Kong chu ṭanpui ngaiin a awm mek nia sawiin British chu pui turin an au. 

Hetihlai hian China chuan, 'one country, two systems' chu a zawm zel tih sawiin, Hong Kong buaina chu China buaina a ni, tiin a sawi. Hun rei tak chhung Hong Kong-a nawrh huaihawtna thleng chungchangah, ramdangte a bikin US leh Britain chu inrawlhah a puh bawk. 

Hong Kong-a nawrh huaihawt bul ṭanna chu sorkarin extradition bill siam a tum vang a ni. Bill duh lohna lantir a nih hnuah, chief executive Carrie Lam chuan bill hi tihtawp a ni dawn tih a sawi a ni. Mahse hemi hnu pawh hian nawrh hi titawp loin, mipuite chuan sorkar laka an lungawi lohna hrang hrangte an lantir chhunzawm zel a ni.