North Korea hotuin zin turin Donald Trump a sawm

North Korea hotu Kim Jong-un chuan US president Donald Trump chu lehkha thawnin, an rama zin turin a sawm tih South Korea chanchinbu chuan nimin khan a tarlang. 

Kim hian August thla khan zin tura sawmna lehkha hi Trump hi a thawn a, hei hi NKorea-in short range projectile enchhin avanga ram pahnihten inbiakna an tihtawp hnu a ni. Trump-a lehkha a thawnah, Kim chuan summit neihleh a duh thu a sawi niin Joongang Ilbo chanchinbu chuan a sawi. 

Lehkhathawn chungchang hi White House, US State Department leh North Korea mission to United Nations chuan an la sawichiang lo. Trump leh Kim hi nikum June thla aṭang khan ṭum thum inhmu tawhin, North Korea missile leh nuclear programme chungchang an sawidun a, mahse an inbiaknaah hian hmasawnna lian tak erawh a la awm lo. 

Kumin June thla khan hruaitu pahnihte hi Demilitarised Zone (DMZ)-ah inhmuin, working-level inbiakna neih chhunzawm leh an remti a ni.