Saudi oil facility beihna: US-in Iran tih ngei a ni tih finfiahna tarlang

Saudi Arabia sorkar oil production facility pahnih beih a nih chungchangah United States chuan Iran chu mawhphurtu an nih thu a sawi hnu lawkah nimin khan satellite aṭanga thlalak, Iran tih ngei a ni tih lanna chu a tichhuak.

Inrinnia Saudi Oil facility beih hi Yemen-a Houthi-te chuan an tih a nih thu leh, Iran chuan inrawlhna an nei lo tih sawi mah se US chuan heihi a pawm lo a, Iran chu mawhphurtu berah a puh a ni. US official chuan satellite thlalak aṭanga a lan dan chuan oil facility beitu drone-te hi hmarthlang lam aṭanga lokal an nih thu leh heihi Yemen-a Houthi thunun lam a nih loh thu a sawi. Houthi hian oil facility beihna hmun chhimthlang lam zawk an thunun a ni, a ti.

Drone-te chu northern Gulf, Iran emaw Iraq emaw aṭanga thlawhchhuahtir ngei a nih hmel thu a sawi. Mahse heihi Iran chuan an pha leh thoa, an ram aṭanga thlawhchhuahtir a nih loh thu an sawi. US Secretary of State Mike Pompeo chuan Pathianni khan Inrinnia oil facility beih chu Iran tih ngei a nih thu a sawi a, finfiahna erawh engmah a tarlang lo. Nimina satellite thlalak hi US intelligence-te tarlan a ni a, hemi chungchangah hian Pompeo hian thuchhuah a la nei leh lo thung.

Oil plant beih hi Saudi sorkar thuhnuaia awm Aramco oil facility a ni a, Abqaiq leh Khurais oilfield-te an ni. Saudi Arabia chuan drone hmanga beih a nih thu leh an ram hunah zing dar 4 velah beih a nih thu tarlangin, thuchhuah an siam hnu lawk hian Houthi hel pawlte chuan drone 10 an tirhchhuah thu leh an tih a nih thu an sawi chhunzawm ve nghal.

Thi leh hliam report engmah awm lo mah se oil facility an beihte hi khawvela oil pechhuak nasa berte an nih avangin nghawng lian tak a neih rin a ni. BBC chuan nimin khan oil plant beih a nih avang hian khawvel puma oil supply chy 5%-in a tlahniam tih an tarlang a, oil man pawh a pung niin an tarlang bawk.