Canada PM-in silai khuahkhirhna dan khauh zawk siam tiam

Canada prime minister Justin Trudeau chuan Toronto  khaw bula silaia inkahna a thlen leh hnuah, an ramin silai khuahkhirhna, 'gun control' khauh zawk a mamawh thu a campaign-naah a sawi. 

Canada hi October 21 hian an inthlang dawn a, inthlan neih tur atana a campaign-naah Trudeau chuan thlan tlin a nih chuan silai khuahkhirhna dan khauh zawk siam a tum thu a sawi. Silaia inkahna tleng ṭhin avang hian chhungkaw tam takte an thlabara, hei vang hian sorkar chuan remruatna ṭha zawk nena silai hman dan hi thunun a pawimawh thu a sawi a ni.

Toronto leh a chhehvelah hian silaia inkahna hi a thleng fo a, kar kal ta Inrinni khan Mississauga hmunah rawlthar kum 17 mi chu kahhlum a ni a, mi pangain hliam an tuar bawk. Thawhṭanni zinga Brampton highway-a inkahna thlengah mi pakhat a thi bawk. Toronto mayor John Tory chuan silaia inkahna hi a thlen tlem theih nan, khawpui lian zawkahte silai neih hi khap a ṭhat a rin thu a sawi. 

Hetih lai hian Justin Trudeau elpui ber Conservative Party hotu Andrew Scheer chuan, "Kan party hian englai pawhin kan mawhphurnate kan hlen ṭhin a, kan hma lawka kan ramin inthlanpui a hmachhawn turah hian, thlan tlin kan nih chuan crime rate a hniam theih nan, hemi kawngah hian nasa takin hma kan la dawn a ni," tiin thuchhuah a siam. Nikum khan Andrew Scheer chuan khawlaia mipuite him zawk nan police officer duty tur dahbelh a tum thu a sawi a, silai neitute leh silai hmang sual ṭhinte chhui chhuah zung zung an nih theih nana hmalak dan turte pawh a sawi a ni.