Myanmar sipaiten Suu Kyi leh hruaitu dang hreng

Myanmar sipaite chuan rorellai National League for Democracy (NLD) hruaitu leh State Counsellor Aung San Suu Kyi, president Win Myint leh hruaitu dang ṭhenkhatte chu nimin khan hrengin, thuneihna an laksak a, kum khat chhung atan ram pumah emergency an puang zui nghal.  

Emergency puan a nih hnu hian an ram khawpui Nay Pyi Taw leh Yangon-ahte sipai ṭhahnem tham tak duty tir nghal an ni. Sipai thunun, Myawaddy TV chuan civil hruaitute man an nih hnuah an ram thuneihna chu armed force commander-in-chief Senior General Min Aung Hlaing kutah hlan a nih thu a puang. Sipai kuta thuneihna hlan a nih leh chhan hi nikum November thlaa inthlanpui an neih kha a dik tawk loh vang niin an sawi. 

NLD thupuangtu Myo Nyunt chuan nimin zing hma takah khan Aung San Suu Kyi, Win Wyint leh hruaitu dangte hi sipaiten manin, hren zui nghal an ni tih a sawi a ni. Nimin vek khan Suu Kyi-i chuan an ram mipuite chu sipai chakna hmanga sorkar paihthlakna chu pawm lo tur leh, lungawi lohna lantir turin a chah. Sipaite chetdan chu dictatorship hnuaia an ram dah leh tumna a ni tiin, "Hei hi pawm lo turin mipuite ka ngen a, an theihtawpa chhang let a, lungawi lohna lantir turin ka ngen a ni," a ti.

Nikum November 8 khan Myanmar ram inthlanpui hi neih a ni a, sorkarna chelh mektu NLD chu hneh taka thlan tlin nawn leh a ni. Mahse sipai lam chuan inthlan result hi sawiselin Supreme Court-ah complaint an thehlut a, mahse a dik lohna finfiahna erawh a nei lo. 

Inthlanpui neiha thil dik tawk lo awm chungchangah chuan sorkar chuan hma a la lo niin sipai lam chuan an puh a, hei bakah hian hripui leng chungin inthlanpui neih hun a sawn hlat duh loh avangin an sawisel bawk. Inthlanpuiah hian NDA hian seat awm zat aṭanga 83% a la pha a ni. He inthlan hi kum 2011-a sipai rorelna tihtawp a nih hnuah inthlan an neih ṭum hnihna a ni. 

Sipaite hian state leh region hrang hranga politician-te bakah political activist-te pawh an hreng nghal bawk a, khawpui lianahte mobile leh phone network pawh hman ṭhat theih lohin a awm a, state broadcaster MRTV pawh khawl lamah fel lo a awm nia sawiin engmah tihchhuah a ni lo.  

Nay Pyi Taw chu biakpawh hleih theih a nih loh avangin khawpui chhung dinhmun pawh hriatchian a har hle nia sawi a ni. Khawpui lian ber, Yangon-ah pawh phone leh internet connection hman hleih theih lohin a awm. BBC World News television bakah international broadcaster-te block nghal vek an ni a, local station-te pawhin engmah an tichhuak thei lo. 

Myanmar Banks Association chuan bank-te pawhin financial service zawng zawng an tihtawp nghal vek tih a tarlang. Hetih lai hian sipai rorelna thlawptu mi ṭhenkhat chuan Yangon khawlaia motor nen kawng an zawh a, an hnam puanzarte vaiin an lawm ve thung a ni. 

Myanmar sipaite chetdan hi ram leh pawl hrang hrangin an dem thu an sawi nghal. 

United Nations secretary general Antonio Guterres chuan thil awmdan chu democracy rahbehna a ni tiin, hruaitu hrang hrangte chu tharum thawhna thlen lo tur leh, mihring dikna chanvo zah turin a ngen. US secretary of state Antony Blinken pawhin thuchhuah siamin, sipaite chet dan an dem thu leh, sorkar official leh civil socieity leader an hrente chu chhuah nghal vek tura an phut thu a sawi a, nikum November 8-a inthlanpui an ram mipuite duhthlanna siam chu zah turin a ti. 

Britain prime minister Boris Johnson pawhin Aung San Suu Kyi leh civilian leader-te chu chhuah nghal turin a phut tih a sawi. Johnson chuan sipai chakna hmanga thuneihna chhuhsak a nih dan chu a dem thu sawiin, mipuiten an roreltu atana an vote tlinte chu zah turin Myanmar sipaite chu a phut tih a sawi. 

India, Australia, Singapore leh ram dang eng emaw zatin Myanmar sipaite chet dan an dem thu leh, democracy kalphung zah tura an duh thute an sawi bawk.