Capt Tom Moore-a'n Covid-19 a kai

Britain rama Covid-19 hripui a leng ṭantirh lama National Health Service tana US dollar maktaduai 41 zet tuak chhuaktu, World War II veteran Captain Tom Moore chu Covid-19 a kai avangin damdawi-inah enkawl a ni. 

Captain Tom Moore hian nikum April 30 khan kum 100 a tling a, kum 100 a tlin hma hian an ram health service-te puala sum tuak nan a huan meter 25-a thui chu vawi za kalchhuah tumin a intuk a ni. A kawng a ṭhat tawh loh avangin rollator a hmang tawh a ni. Damdawi lam thawktute puala a thiltih hian ngaihven leh hlutpui a hlawh hle a, a tirah dollar 1,000 vel tuak chhuah theih a inrin laiin, dollar mtd 41 zet a tuak chhuak thei ta a ni. Guiness world record pahnih a siam bakah, Queen Elizabeth-II chuan knigh nihna a pe a, Machael Ball nen an zai dunna chu UK single chart-ah No.1 an nihpui zui bawk. 

Captain Tom Moore-a fanu, Hannah Ingra-Moore chuan Pathianni khan a pa hi hun eng emaw chen pneumonia vanga enkawl a nih hnuah Covid-19 a kai tih hriat a nih hnuin Bedfort Hospital-ah dah luh a nih thu hi a sawi a ni. Damdawi-ina thawkte chuan a pa chu an ngaihsakin an duat hle tih sawiin, dam taka a chhuah leh thuai a beisei thu a sawi.