Taliban-ten Trump inbiakna neihpui inpeih

Afhanistan-a Taliban firfiak pawl chuan US President Donald Trump chuan a duh a nih chuan inbiakna neihpui turin kawng an hawng reng tih BBC an hrilh.

Taliban chief negotiator Sher Mohammad Abbas Stani­kzai chuan Afghanistan indona tih­tawp a nihna tur chuan inbiakna neia indawr a ngai tih a sawi. US president Trump-a'n Taliban nena inbiakna neihna tura ruahmanna awm zawng zawng chu tihtawp a nih thu a sawi aṭanga kar khat liam hnuah Taliban lam hian thuchhuah hi an siam leh a ni.

Stanikzai chuan US-in Tali­ban an puhna chu pawm loin, engmah tihsual an nei lo tih BBC a hrilh. An ngaihdan chuan US chuan Taliban sang chuang an that ve tho tih sawiin, tunah US sipai pakhat an that a nih chuan engmah an sawibuai thei bik lo tih leh inkahhai pawh an puang lo tih a sawi.

"Keimahni lam aṭang chuan inbiakna nei turin kawng a inhawng reng a ni," tia sawiin, pawl lehlam ve ve chuan inbiak­na nei tura thutlukna chu an siam tawh chu an ngaihtuah ṭhat leh a ngai a ni, a ti bawk. Washington top negotiator Zalmay Khalilzad chuan a thu­phunga inremna an siam tawh chungchang sawiin, September 3 khan TV-a an interview-naah US chuan Afghanistan aṭangin an sipai 5,400 chu kar 20 chhungin an lachhuak anga; Taliban lam pawhin Afghanistan chu firfiaka chetna tura inkulhna atan an hmang tawh lo ang tih a sawi.

Stanikzai chuan BBC hnenah hian US nen inremna an ziak a nih chuan inkahhai puan a nih zui dawn thu a sawi ve bawk. Mahse Taliban leh Afghanistan sorkar inkarah erawh inkahhai puan a ni lo, a ti thung. Taliban chief negotiator chuan September 23 aṭang hian intra-Afghan talk neih a ni dawn tih sawiin, hetah hian inkahhai chungchang pawh zau zawka sawi a ni ang, a ti. Inremna zawnga inbiakna neihna tur kawngah hina Russia leh China pawh ṭanpui turin a be tawh tih a tichiang bawk.

Afghan national security advisor Dr Hamdullah Mohib chuan BBC hnenah vek hian Tali­ban-te invauna 'tactic' chu a hlawh­tling ngai lo ang tih sawiin, Afgha­nistan-ah inremna tluantling a awm dawn a nih chuan Afghan sorkar nen inbiakna neih a ngai, tiin a sawi. 

Tun thla tir khan US leh Taliban-te hian inbiakna neih an tum a, Donald Trump pawhin Taliban senior leader-te leh Afghan President Ashraf Ghani-te chu September 8-a Camp David-a hmu turin ruahmanna a siam. Mahse Afghanistan khawpui, Kabul-a September 6-a Taliban-ten pawikhawihna an thlenah khan US sipai pakhat leh midang 11 an thi a, hemi hnu hian Trump chuan inbiakna neih tum chu ṭhulh a nih thu a puang zui a ni.