Venezuela-in Guaidó deputy chhuah zalen
Venezuela opposition leader Juan Guaidó deputy Edgar Zambrano chu Venezuela sorkar chuan a chhuah zalen.
Edgar Zambrano hi sorkar laka hela puhna thubuai awrhtir niin thla li chhung tan-inah khung a ni a, May thla aṭang khan tantir a ni.
President Nicolás Maduro-a'n an ram politics buaina chinfelna kawnga eptu party tenau zawkte inremna a siampui tuk lawkah Edgar Zambrano hi man a ni. Prosecutor General Tarek William Saab chuan Thawhlehni khan sorkar chuan Supreme Court hnenah Zambrano chhuah tirna tur petition hi an thehlut tih sawiin, Venezuela sorkar leh eptu pawlten inremna ṭhenkhat an siam avanga petition hi thehlut an nih thu a sawi bawk.
April thla khan opposition leader Juan Guaidó hian armed force member 30-te nen duh lohna lantirin, inthlanna an neih zawh taka Maduro tlin danah thil dik tawk lo a awm tih a sawi a, amah hi interim President-ah a inchhal zui bawk a ni. Air force base bula video a record a tihchhuah, sipaite Maduro paihthla tura a sawmna video-ah Edgar Zambra-no hi a lan ve avangin tualchhung buaina chhuakah a inrawlh ngei tih finfiahnaa ngaiin an man zui a ni.
Zambrano bakah hian lawmaker dang 14 pawh Venezuela sorkar hian an man a ni. Hetihlai hian khawvel ram 50 chuang zet chuan Juan Guaidó hi Venezuela hruaituah an pawm thu an puang thung.