Egypt president hlui fate pahnih thiam chan tir

Egypt president hlui Mohamed Hosni Mubarak-a fate pahnih, Alaa leh Gamal Mubarak chu kar liam ta Inrinni khan Cairo Criminal Court chuan eiruk thubuai an neihah thiam a chan tir. 

Alaa leh Gamal Mubarak leh an thurualpui dang nia puhte chu eiruk thubuai siamsak an ni a, Egypt stock exchange market leh Central Bank of Egypt dan kalha chea puhin,  stock exchange pawh an duh dan anga khawih danglamah puh an ni. 

Hei bakah hian Cyprus-a hmunpui nei, an company kaltlanga dik lo taka hlawkna sum telah puh an ni bawk. 

Cyprus-a an company kaltlang hian bank tam takah share nei ṭeuhin, bank ṭhenkhatah chuan share ngah ber te an ni bawk. A ruka inremna an siam hmangin, Cyprus-a an company hian national bank share a neih aṭangin US dollar maktaduai 31.7 zet dan kalhin an hai lut nia puh an ni. 

Kum 2018 September thla an thubuai avanga man an nih hnuah, Cairo criminal court chuan Mubarak-a fate pahnih hi bail-a chhuah a phalsak. 

Kum 2011-a Egypt president aṭanga Mubarak paihthlak a nih hnu khan a fate, Alaa leh Gamal nen an pafa thumin presidential palace cheina tur pawisa khawihchingpen leh thuneihna hmang sualah puh an ni. Kum 2015 May thla khan  he thubuaiah hian thiam lo chantirin an pafa thum hian kum thum jail tang tura hrem an ni zui bawk.