Covid-19 WHO expert team-in Wuhan an tlawh
World Health Organization (WHO) expert team chuan kar liam ta Inrinni khan Covid-19 len ṭanna, China-a Hubei province khawpui, Wuhan an tlawh.
WHO expert team hian Wuhan health department-a thuneitute kawmin, hri leng mek chungchang leh an hma lak dante an sawipui a, medical and health institution-te an tlawh kual bawk.
February 16 aṭang khan WHO leh China joint expert team-te chuan China-a hri leng chungchang hi an zirchiang tawh a, Beijing, Guangdong province leh Sichuan province-te pawh an lo tlawh tawh a ni. Member 12 awmna, WHO expert team-ah hian US, Germany, Japan, Nigeria, Russia, Singapore leh South Korea aṭangin mi thiamte an tel a ni.
China health official-te chuan nimin khan Covid-19 kai thar mi 648 an awm thu a an puang leh a, mahse heng zinga 18 chauh hi Hubei province pawn lama mi an ni. China ramah hian Covid-19 vanga thi hi mi 2,345 tling tawhin, a hri kai finfiah tawh hi mi 76,000 an chuang tawh bawk. He hri leng mek thihpui hi la awm reng mah se, a kai thar leh thihpui zat hi China ram chhungah chuan a tlahniam zel tih an sawi. Hetih lai hian ram dangah erawh hri kai thar hi an pung mek thung.
China tih lohah South Korea chu Covid-19 kai tamna ram a ni a, nimin thleng khan mi 600 chuangin he hri hi an kai tawh a, mi panga-in an thihpui tawh bawk. Nimin bikah khan hri kai thar hi mi 169 hmuhchhuah an ni.
Iran-ah pawh Covid-19 vang hian kar liam ta Thawhlehni aṭang khan mi pariat an thi tawh a, a hri kai finfiah tawh hi mi 43 an awm bawk. Italy-ah pawh mi pahnihin an thihpui tawh a, hri kai hi mi 73 an awm bawk a ni.
Covid-19 hi China bakah ramdang 26-ah a darh tawh a ni.