Israel PM Netanyahu party-in Majority an nei pha lo

Israel ram inthlanpui neih zawh takah prime minister Benjamin Netanyahu party, Likud Party chuan party mala sorkar siam thei turin a chak zo lo a, hei vang hian ṭangrual sorkar siampui tur a zawn leh a ngai dawn a ni. 

Inthlan result kimchang hi tihchhuah la ni lo mah se, a nih dan tur chu hriat theih a ni tawh a ni. Party mala sorkarna siam thei an awm dawn lo. 

Israel Parliament, Knesset-a seat 120 awmah, Likud Party leh a thawhpuite chuan seat 55 an lak phak rin a ni a, mahse sorkar siam tur erawh chuan seat 61 neih phak a ngai a ni. Hei vang hian Netanyahu chuan right-wing party hruaitute a hmu a, anni pawhin sorkar thar siamna turah puih an inhuam thu an hrilh tawh niin Likud party thupuangtu chuan a sawi. 

Vote tlate hi chhiar kim a nih hunah, Israel president Reuven Revlin chuan Parliament member nei pha party hrang hrang hruaitute chu kawmin, sorkar siamtu tur pawh a sawm dawn a ni. Sorkar siam tura sawmna a pek hnuah, ni 42 chhung hun pek an ni ang. 

Kumin April thlaa inthlanpui an neihah khan party mala sorkarna siam pha an awm lo a, Likud party chu seat la hnem ber niin, ṭangrual sorkar siampui turin party dangte dawr mah se, hun tiam chhungin sorkar an siam thei ta lo a ni. Hei vang hian September 17 khan inthlan hi neih ṭhat leh a ngaih phah a ni.