Saudi Arabian oil plant: Ralthuam hmanin Iran an inrawlh tih finfiah!

Saudi Arabia defence ministry chuan an ram chhunga oil plant lian pahnih beihna atana  ralthuam hman them an zirchianna aṭangin Iran chu an inrawlh ngei tih an sawi.

An oil plant lian pahnih beihna atan hian drone 18 leh cruise missile pasarih an hmang tih an sawi bawk. Defence ministry chuan finfiahna pe tur hian press meeting an ko a, drone (UAV) chhe them leh missile puak bangte chu chhawpchhuakin, defence ministry thupuangtu Col Turki al-Malki chuan hmar lam aṭangin drone leh missile-te hi kahchhuah an ni tih sawiin, Iran-in a sponsor ngei a ni tih chu phat theih a ni lo, a ti.

Col Malki chuan an kahchhuahna hmun tak erawh an la hriat loh thu leh hriat tumin hma an la mek tih a sawi a, Inrinnia an oil plant beih a nihna map, thlalak leh video-te pawh kalkhawmte hmuh theih turin a tarlang. Abqaiq oil facility beihnan hian UAV hi 18 an hmang tih leh, Khurais oilfield leh Abqaiq  beihna atan hian cruise missile pasarih an hmang tih a sawi.  Khurais beihna atan hian missile pathum an hmang a, Abqaiq beihna atan hian pali an hmang tih a sawi bawk.

Saudi Arabia puhna hi Iran chuan official takin chhana a la pe lo. Inrinnia inbeihna thleng kha Houthi helte chuan an tih niin chhal mah se US chuan Iran a inrawlh tih a puang nghal a, kartir khan satellite thlalak tarlangin Iran lam aṭanga kahchhuah ngei a nihzia a lo tarlang tawh bawk.