Kamila Shamsie award dawn tur cancel sak

Germany-a Dort­mund khua chuan kumina 'Nelly Sachs Prize' dawng tura an thlan, British Pakistani novelist Kamila Shamsie hnena award pek tur chu cancel a nih leh thu a sawi. 

Kamila Shamsie hian he award a dawn theih dawn loh chhan hi Palestinian Boycott, Divestment and Sanctions (BDS) movement a support vang a ni a, he movement hi Palestinian ho hmalaknain kum 2005 aṭanga kalpui a ni. Palestinian raltlante hamṭhatna, dikna leh an chanvote chu, Israel lak aṭanga an neih let leh theih nana hmalakna leh Israel sorkarin Palestinian ho chunga a chetnate dodalna a ni.

Nilaini khan award committee, member 8 awmna chuan Kamila Shamsie hi politics lama a inrawlh chu ṭha an tih loh avangin September 6 aṭanga vote an laknate nen an cancel nghal vek a ni. Heng bakah hian kumina he award an sem tur hi an cancel bawk.

"Fim taka ka ngaih­tuahna leh, zalen taka ngaihdan ka sawi chhuah avanga award committee member-te'n 'Nelly Sachs Prize' dawng thei lo tura min tih hi, kan tan chuan thu hriat lawmawm lo tak a ni." tiin kum 46 mi, Kamila Shamsie chuan a twitter-ah a sawi.

Shamsie-i hi a leh­khabu ziah 'Home Fire' vangin nikum khan Women's Prize for Fic­tion award hlan a ni. Nelly Sachs Prize hi kum 1962 aṭanga sem ṭan niin, kum 2 dana sem ṭhin a ni a, cash prize euro 15,000 a keng tel bawk.