Hyundai company-in USD mtd 47 chawi dawn
Dan lo anga diesel engine an lakluh avang leh diesel engine bal an hralh chhuah avangin, South Korean automaker Hyundai company chuan USD mtd 47 an chawi tur thu US thuneitute chuan nimin khan an sawi.
Hyundai company chet dan hian "American environmental rules" a kalh thu an sawi. Kum 2012-2015 inkar khan Hyundai hian diesel engine 2,300 a lalut a, he an lakluh hian US boruak bal (emissions standard) tehna a phak loh thu US Justice Department chuan a tarlang. Hemi chungchangah hian kum 2015 khan US Environmental Protection Agency hnenah complaint thehluh a ni.
Environment and natural resources division head Jeffrey Bossert Clark chuan Hyundai company hian an hlawkna piah lamah mipuite tana ṭha lo thil an ti a ni, tiin a sawi. A hma pawhin boruak vawn thianghlim chungchanga dan bawhchhiahah puhin, US court chuan Hyundai company hi USD mtd 2 chawi turin a lo ti tawh bawk.
US thuneitute chuan Hyundai diesel engine chuan boruak bal (emissions standard) tehnaa boruak tibal ṭhintute zinga particulate matter (PM) leh nitrogen oxide(NO)-te chuan he bal tehna hi an paltlang zawh loh thu an sawi.