Indonesia ram kang kaihhnawihah mi 230 man

Indonesia police-te chuan ram kang nasa tak thlenga mawhphurtua puh mi 230-te chu an man thu Ningani khan an sawi.

An man zinga mi pathumte chu Thawhṭanni khan man an ni tawh a, Tesso Nilo National Park-ah heng mi pathumte hian thlai chinna atan lo/ram chu an hal nia hriat a ni. He park-ah hian sai leh nungcha hrang hrang an chen thu, national police thupuangtu Dedi Prasetyo chuan a sawi a ni. An  mi mante hi "Environmental protection law" hnuaiah kum 10 thleng lungin tan tir theih an ni. Ram kang hi a kan ṭantirhna hmun zawn chhuah a nih theih nan plantation company 49-te chu chhui an ni.  

Indonesian Disaster Mitigation Agency chuan Ningani khan hmun 4,319-ah kangmei a chhuah thu hi an sawi a, chung zinga 99% chu hal luih vanga kang nia hriat a ni. Helicopter 44 hmangin kang ṭhelh hna hi thawh a ni a, helicopter aṭang hian tui litre mtd 270 chuang thlak a ni bawk.  

Kang ṭhelh hna hi sipai 29,000 chuangin an thawk a, ram kang hian hectare 3,28,700 zau ram a awh bawk. Kumtinin ram kang vangin Indonesia ram hian harsatna a tawk ziah a, ram kang hian an ram ṭhenawm ramte a ti buai fo. Indonesia ram kang vanga boruak ṭha lo chuan an ṭhenawm ram Singapore, Malaysia leh Thailand hmar thlengin a nghawng ṭhin.

Ram kang avanga meikhu tam lutuk hian thil hmuh a ti harsaa, Indonesia leh Malaysia ramte chuan an thlawhtheihna an cancel nual bawk. Heng bakah hian zirna-in 1000 chuang chu khar a ni. A bikin Malaysia-ah hian zirlai mtd 1.5 chuang a nghawng a ni.

Singapore ramah pawh boruak bawlh­hlawh avangin Ningani khan kum upa zawk te, raipuar leh naupang­te chu pawn lama chhuak tam lo turin thuneitu lam chuan an hriattir. Thailand rama Prince of Songkhla University-a Air Pollution Research Station chuan meikhu tamna hmunah mipuite chu pawn chhuak tam lo turin leh, pawn an chhuah pawha mask vuah turin a hriattir bawk.

Indonesia-in ram kang a tawn tawha la nasa ber chu kum 2015 kuma mi kha a ni, ram hectare mtd 2.6 a zau a kang a ni.