US - China trade deal atan hmalakna awm rih dawn lo : Trump
US president Donald Trump chuan nakkuma President inthlan an ramin an hmachhawn leh hma chu, China nena insumdawm tawnna lama inremna siam tura hmalakna engmah an neih tawh dawn loh thu, kar kal ta Zirtawpni khan thuthar lakhawmtute hmaah a sawi.
Nikum March thla aṭang khan Trump chuan an ramin China bungrua USD tld 250 hu chin an lak luh ṭhin aṭanga chhiah lak chu 25%-ah a tisang a ni. A chhan let nan China pawhin US bungrua USD tld 110 hu chin an lak luhah chhiah sang tak a la ve nghal bawk.
"China-in economy lamah harsatna an tawk nasa hle a ni. An sumdawnna hrang hrang a tlachhia a, an company-te chuan tlakchhiat lam a pan a, a chhan chu US-in 25% chhiah China bungrua laka an lak an pek ṭhat theih loh vang a ni," tiin Trump chuan a sawi.
Kumin August thla aṭang khan US leh China hian insumdawn tawnna lamah innghirnghona an neih belh a, an inep chhunzawm zel a ni. "Tun dinhmunah chuan China hian tlakchhiat lam a pan a, kar hnih liam ta thleng khan China economy chu kum 22 chuang tlahniam tawh ang a ni," tiin Trump chuan China dinhmun deu takin a sawi.
US hian China bungrua laka chhiah an lak tam avang hian America ram chhunga thil siamte chu a tlawm phah thei a, America mipuite chuan an ram siam ngei an lei uar theih phah bawk a ni. Hei hian tualchhunga sumdawngte a pui thei dawn a, an ram economy thlengin a ṭhatpui phah thei a ni.
Chutih rualin China hian an ram currency hlutna a tisang duh lo a, hei hi ramdang aṭanga bungraw lakluh a tlem theih nan leh an rama aṭanga thil siam chhuah a tam theih nan an ti ve bawk.