Sri Lanka-a bomb puak chhui chiang tur committee din

Sri Lanka president Maithripala Sirisena chuan kar kal ta Inrinni khan, kumin Easter Sunday-a bomb puak chungchang chhui turin member panga awmna committee a din.

Kumin April 21 khan Sri Lanka khawpui Colombo hmuna biak-in pathum leh hotel pathumah, suicide bomber pakuain bomb an ti puak a, heng bomb puak vang hian mi 258-in nunna an chan a ni.

President-in committee a dinah hian judge pahnih, high court judge pahnih retire tawh leh administrator hlui pakhat an awm. Islamic State (IS) firfiak pawl chuan Easter Sunday-a bomb puak hi an tih a nih thu an sawi a, mahse Sri Lanka sorkar lam chuan an ram chhunga National Thawheed Jamaath (NTJ) Islamic firfiakte tihah a puh thung.

Committee thar din a nih hma hian, president Maithripala Sirisena chuan member pathum awmna panel a lo din tawh a, mahse chak zawka thil awm dan an chhuichhuah hma theih nan he committe thar hi din belh leh a ni.