Iran-in Gulf-ah ram dang sipaite inrawlh lo turin vau
Iran president Hassan Rouhani chuan ram dang sipaite chu vauin Gulf-a venhimna tiderthawng zawnga che lo turin a ti.
US chuan helai hmunah hian a sipaite a dah thu a puang a, hemi hnu lawk hian Hassan Rouhani chuan ram dang sipaite hi inrawlh lo turin a vau zui a ni. Ram dang sipaite chuan natna leh lungngaihna bak an thlen lo tih sawiin, ralthuam intlansiakna atan Gulf chu hman a ni tur a ni lo, a ti bawk.
Saudi Arabia oil facility pawimawh tak tak pahnih drone leh missile hmanga beih a nih hnu khan US hian a sipaite a tirlut nghal a, he thila mawhphurtuah hian Iran chu a puh a ni. Rouhani chuan United Nations-ah Iran chuan Gulf peace initiative thar an pharh dawn tih a sawi bawk.
1980-1988 Iran-Iraq war anniversary-a thu a sawinaah, Iran President chuan ram dang sipaite chuan buaina leh harsatna tam tak, a bik takin tualchhung mite himna kawngah harsatna an thlen thei a ni, a ti. Chung ram dang mite chu hun kal tawhah pawh chhiatna thlen tawh ṭhintu an ni, tia sawiin inrawlh lo turin a ti a ni.
Iran leh US inkar boruak hi a chhe hle a, US president Donald Trump-a'n Iran nuclear del aṭanga a inhnuhdawh thu a sawi aṭang khan boruak hi chhe chho ṭanin, middle east-a pawikhawihna hrang hrang thlen turah US chuan Iran hi a puh zui a ni.