IS firfiakten Iraq-ah mi pali that
Islamic State (IS) firfiakte chuan Iraq Anbar western province-ah chhungkaw pakhata mi pali an kaphlum tih thuchhuah siamin nimin khan provincial official-te chuan an sawi.
Official-te chuan pawikhawihna thlen hun hi Inrinni zan kha a ni tih sawiin, IS-te chu tribal Hashd Shaabi fighter paramilitary member pakhat inah lutin he ina cheng mi pali hi an kaphlum tih an sawi. Pawikhawihna thlenna hmun hi al-Kheriat khua a ni a, provincial capital Ramadi khaw chhak lam km 60 vela hlaa awm a ni.
Firfiakte hian paramilitary member hi an kahhlum bakah hmeichhe pahnih leh naupang pakhat an kaphlum bawk. Iraqi security force-te chuan chanchin an hriat velah inkahna thlenna hmun hi an pan nghal a, pawikhawihtute hi an zawng zui nghal bawk a ni.
Iraq-ah hian pawikhawihna thleng hi a tlem sawt viau nia tarlan a ni a, 2017-a Iraqi security force-ten IS firfiakte ramchhung hmun hrang hranga an hneh hnu aṭang khan pawikhawihna pawh a thleng tlem ve tial tial a ni. Hetihlai hian IS-te chuan pawikhawihna hi a khat tawkin an la thlen reng thung.