Saudi Oil facility beihna: Boris Johnson-a'n Saudi oil plant beihnaah Iran dem

September 14, Inrinni hmasaa Saudi Arabia oil facility pahnih beihnaah UK prime minister Boris Johnson chuan Iran chu a dem tih sawiin, missile leh drone hmanga oil plant beihnaah hian Iran inrawlh theihna chance a sang hle tih a sawi.

Johnson chuan Gulf region-a buaina tihziaawm a nih theihna turin US leh Eurpoean ram dangte chu a thawhpui dawn tih sawi bawkin, Saudi emaw American emawte chuan ṭangkaina kan nei em tiin min zawt se chuan kan ṭangkai theihna tur kawng chu kan dap mai dawn a ni tiin, Saudi leh US puih a inpeih thu a sawi a ni.

Thuthar thehdarhtute chuan sipai hmanga beihpui thlak tumna a awm em tia an zawhna chu chhangin, ruahmanna awmdan a zirin engtin nge an ṭangkai ve theih ang tih chu an ngaihtuah chhunzawm dawn a ni, a ti. Saudi oil plant beih chungchangah hian Johnson hian France president Emmanuel Macron leh Germany chancellor Angela Merkel-te pawh UN-ah meeting a neihpui dawn a, Brexit chungchang pawh an sawiho dawn bawk. US president Donald Trump pawh meeting a neihpui thuai dawn a ni. 

UN General Assembly hunah Iran president Hassan Rouhani pawh a hmu dawn nia sawi a ni bawk. Saudi oil plant beihnaah hi Yemen-a Houthi helte chuan an tih niin chhal mah se US leh Saudi Arabia-te chuan Iran tihah hian an puh a, US intelligence-te pawhin satellite thlalak aṭangin finfiahnate pawh an tilang tawh a ni. US hian Saudi Arabia-ah hian a sipaite a tir lut tawh bawk.

US president Donald Trump chuan Pathianni khan tunkar chhunga neih tur UN General Assembly kar lakah Iran president Hassan Rouhani meeting neihpui turin ruahmanna a siam lo tih a sawi. 

Pathiannia Texas leh Ohio tlawh tura a chhuah hma lawka thuthar thehdarhtuten an kawmnaah Trump chuan hemi chungchang hi sawiin, ruahmanna a awm loh avang hian meeting an nei thei dawn lo tihna erawh a nih loh thu a sawi thung."Mi insiam rem thei tak ka ni. Tunah erawh meeting nei tur hian ruahmanna kan siam lo a ni," a ti.