Israel-a Arab Party-in Benny Gantz thlawp dawn

Israel ram inthlanpui neih zawh takah party mala sorkarna siam thei an awm loh avangin ṭangrual sorkar siam dan kawng dap mek a ni. Israel-a Arab party, Joint List party chuan prime minister Benjamin Netanyahu khingpui Benny Gantz zel thlawp an tum tih an sawi. 

Inthlan result kimchang hi tihchhuah a ni tawh a, Benny Gantz kaihhruai centre-left bloc, Blue and White Party chu seat la hnem ber niin, Parliament seat 120 awmah seat 33 ala a ni. PM Benjamin Netanyahu party, Likud Party chuan seat 31 a la bawk. Party pahnihte hian ṭangrual sorkar siam tumin party dangte an dawr mek. 

President Reuven Rivlin chuan Pathianni khan party leader-te kawmin, sorkar thar siam dan tur chungchang a sawipui. President chuan Gantz leh Netan­yahu-te chu thawkdun turin thurawn a pe. Kumin April thla khan Israel ram inthlanpui hi neih a lo ni tawh a, hemi ṭum pawh hian party mala sorkarna siam thei an awm lo. Likud Party chu seat la hnem ber niin ṭangrual sorkar siam tura sawm a ni a, mahse hun tiam chhunga sorkarna an siam hman loh avang leh, party dangin ṭangrual sorkar an siam bik loh avangin September 17 khan inthlan hi buatsaih nawn leh a ni. 

Sorkar thar siamtu tur hriat theih a la ni lo a, hetihlai hian Arab party hi a hmain sorkar siamtu lamah a la tel ngai lo. Mahse tun ṭumah erawh chuan Gantz-a kaihhruai lam chu sorkar siam thei tura thlawp an tum thu an sawi. 

Netanyahu chuan Arab party-in Gantz an thlawp chu a sawisel zui nghal. Hemi awmzia chu thlan tur pahnih a awm tihna a ni tiin, "Juda state tia Israel ram thei lotu telna sorkar siam nge, 'ram hmangaihtu, sorkar huapzau zawk siam' tih a ni," a ti.